Më 13 shtator 2025, në Bernë u mbajt Konferenca për Migracionin e Bashkimit Sindikal Zviceran (USS) – një sinjal i fuqishëm kundër gjuhës së urrejtjes nga ekstremët e djathtë dhe për një shoqëri solidare. Rreth 60 pjesëmarrës miratuan njëzëri një rezolutë kundër iniciativës së UDC/SVP-së «Jo një Zvicre me 10 milionë banorë». Kjo iniciativë nuk është vetëm një sulm ndaj lirisë së lëvizjes, por rrezikon drejtpërdrejt të drejtat e të gjithë punëtorëve – veçanërisht të migrantëve.
Iniciativa e SVP-së premton kontroll të supozuar mbi zhvillimin e popullsisë, por çmimi do të jetë i lartë: ndërprerja e marrëveshjeve bilaterale do të dobësonte mbrojtjen e pagave, do të rrezikonte vendet e punës dhe do ta izolonte Zvicrën ekonomikisht. Presidenti i BSZ-së, Pierre-Yves Maillard, paralajmëroi: “Qëllimi i elitës së SVP-së është të përçajë punëtorët, të reduktojë të drejtat dhe të promovojë dumpingun social.” Kjo vlerësim u theksua edhe në fjalimin hapës të Hilmi Gashit, kryetar i Komisionit për Migracionin të USS-së: “Kjo konferencë zhvillohet në një kohë kur në mbarë botën ekziston një aleancë e rrezikshme mes ekstremistëve të djathtë, ideologëve liberalë të djathtë, miliarderëve të teknologjisë dhe qarqeve fundamentaliste që punojnë kundër interesave të popullsisë punëtore. Ata sulmojnë sistemet tona të sigurimeve sociale, dobësojnë të drejtat e punës dhe nxisin urrejtje ndaj migrantëve, grupeve të racializuara, LGBTIQ+, feministëve dhe grupeve të tjera të margjinalizuara.”
Hilmi Gashi kujtoi se këto tendenca kanë një histori të gjatë edhe në Zvicër – nga iniciativa e Schwarzenbach deri te fushatat aktuale të SVP-së: “Jo vetëm me fushatat e SVP-së në dekadat e fundit, por edhe më herët, kur flitej për “Überfremdung” apo tjetërsim të vendit me të huaj. Iniciativa e Schwarzenbach jo vetëm që polarizoi, por krijoi një klimë urrejtjeje deri në dhunë ndaj njerëzve.” Strategjia është e qartë: përçarje në vend të solidaritetit, nacionalizëm i egër në vend të drejtësisë sociale. Pjesë të elitës ekonomike e përdorin këtë gjuhë urrejtjeje për të zbatuar reforma neoliberale – në kurriz të popullsisë punëtore.
Rezoluta e konferencës e bën të qartë: «Si lëvizje sindikale, i kundërvihemi këtyre sulmeve me atë që na bën të fortë: solidaritet, organizim kolektiv dhe mobilizim, si dhe luftë për një shpërndarje të drejtë të pasurisë.” Hilmi Gashi theksoi në fjalimin e tij: “Ne themi qartë: nuk do ta lejojmë këtë. Si lëvizje sociale dhe sindikale, qëndrojmë për një vizion tjetër: për një shoqëri ku të gjithë njerëzit – pavarësisht prejardhjes apo statusit të qëndrimit – kanë të drejta dhe mundësi të barabarta.” Ky vizion u konkretizua gjatë konferencës: në diskutime paneli dhe grupe pune, pjesëmarrësit shkëmbyen ide për strategji kundër populizmit të djathtë, për iniciativën për demokraci dhe për betejat lokale në jetën e përditshme. Qëllimi është zhvillimi i mundësive konkrete për veprim dhe forcimi i bazës sindikale.
Konferenca nuk ishte vetëm një vend për analizë, por edhe për rrjetëzim dhe mobilizim. Hilmi Gashi e përmbylli fjalimin e tij me një thirrje: «Ta shfrytëzojmë këtë ditë për t’u lidhur, për t’u forcuar dhe për të vepruar në mënyrë solidare.” Sindikatat e BSZ-së riafirmuan angazhimin e tyre për më shumë pjesëmarrje, kushte më të mira pune dhe një shoqëri të bazuar në respekt dhe barazi. Iniciativa e SVP/UDC-së mund të jetë e zhurmshme – por përgjigjja e lëvizjes sindikale është e qartë, solidare dhe e vendosur.
Teksti i rezolutës në gjermanisht/frëngjisht Nuja te Komunikata për Media në gjermanisht/frëngjisht
Osman Osmani, është eskpert i migracionit dhe aktivizmit politik. Ka puniuar si ekspert i migracionit në Deperamentin për Politikë të sindikatës Unia