Më të rëndësishmet nga politika, migracioni dhe shoqëria.

Migracioni është normal dhe Zvicra ka qenë prej kohësh shoqëri migrimi. Migrimi nuk është përjashtim, por pjesë e historisë së njerëzimit dhe rrjedhimisht edhe e Zvicrës.
Dita Ndërkombëtare e Migrantëve, 18 dhjetori na kujton se të drejtat e njeriut duhet të vlejnë për të gjithë, pavarësisht nga pasaportat. Por realiteti është ndryshe: Konventa e OKB-së për Mbrojtjen e të Drejtave të të Gjithë Punëtorëve Migrantë dhe Anëtarëve të Familjeve të tyre është ratifikuar nga 58 vende. Këtu nuk përfshihet asnjë shtet i industrializuar, as Zvicra. Kjo është e turpshme. Këto shtete përfitojnë nga migracioni, por nuk duan që të drejtat themeloree të njeriut të zbatohen për ta.

Pse është e rëndësishme kjo? Për shkak se mungesa e të drejtave themelore favorizon shfrytëzimin. Kush i dobëson punëtorët ligjërisht, i bën ata të shantazhueshëm - dhe hap dyert për dumping të pagave, shfrytëzim dhe pasiguri. Iniciativa kaotike e SVP-së “Zvicra pa 10 milionë banorë“ ndjek pikërisht këtë logjikë: Ajo dëshiron të përmbysë lëvizjen e lirë të njerëzve dhe masat dhe instrumentet që mbrojnë pagat tona. Ky do të ishte një hap i madh prapa për të gjithë të punësuarit, jo vetëm për migrantet dhe migrantët.

Migrimi nuk është kërcënim. Kërcënuese janë praktikat shfrytëzuese dhe strategjitë politike, të cilat ushqejnë frikën, përçajnë dhe krijojnë terren për racizëm dhe urrejtje. Zvicra funksionon falë punës së shumë njerëzve pa pasaportë zvicerane. Kush e injoron këtë, rrezikon bazën sociale, bashkëjetesën shoqërore dhe mirëqenien e vendit tonë.

Përgjigjja jonë? Solidariteti. Është një nevojë strategjike, jo vetëm brenda nesh, por në mbarë botën. Kapitali nuk njeh kufij - solidariteti ynë nuk duhet të njohë. Vetëm së bashku jemi të fortë.

Ju urojmë festa të bukura dhe ju falënderojmë për besnikërinë dhe solidaritetin tuaj.