Komisioni për ekonomi i Këshillit Kombëtar dëshiron të mbrojë më mirë punëtorët e ndërtimit dhe ka kërkuar që kontraktorët e ndërtesave të mos rrezikojnë një ndëshkim kontraktual, për vonesat në rast të ndërprerjes së punimeve në ndërtim për shkak të nxehtësisë.
Puna në kohët me vapë është e dëmshme për shëndetin. Por, kantieret e ndërtimit shpesh vazhdojnë të punojnë, sepse përndryshe ato përballen me ndëshkime kontraktuese– duke përfshirë edhe nga qeveria federale. Kjo është gati të ndryshojë. Komisioni për ekonomi dhe i tatimeve i Këshillit Kombëtar (WAK-N) miratoi mocionin me 15 vota pro, 7 kundër dhe 1 abstenim, siç raportuan shërbimet parlamentare më 18 dhjetor 2024. Ai i bën përgjegjës në veçanti pronarët e ndërtesave publike. Me këtë mocion, Komisioni dëshiron të ndihmojë në zbatimin sa më shpejt të një shqetësimi të përbashkët të pronarëve të ndërtesave dhe sindikatave. SVP/UDC si zakonisht kur është në pyetje mbrojtja e shëndetit votoi kundër mocionit.
Nëse puna në kantieret ndalohet për shkak të vapës, kompanitë nuk duhet të rrezikojnë më ndëshkime kontraktuale për vonesat. Sipas mocionit, kompanitë duhet të jenë në gjendje të sigurojnë shëndetin dhe sigurinë në vendin e punës gjatë nxehtësisë ekstreme, duke ndërprerë punën pa rrezikuar ndëshkime kontraktuale.
Vapa rrit rrezikun e fatkeqësive dhe dëmtimit të shëndetit në kantieret, shkruan komisioni i përmendur, duke theksuar përgjegjësinë e punëdhënësve për mbrojtjen e shëndetit. Nëse masat si rregullimi i orarit të punës, kufizimi i punës jashtë orarit dhe pushimet e rregullta nuk janë të mjaftueshme për të garantuar sigurinë e punonjësve, e vetmja mundësi që mbetet është ndërprerja e punës. Oraret fikse e bënë gjithnjë e më të vështirë ndërprerjen e punës në kantier gjatë vapës ekstreme.
Deklarata të Këshillit Federal 16.10.2024
Për shkak të ndryshimeve klimatike, duhet të presim valë më të shpeshta të të nxehtit në Zvicër. Këshilli Federal është i mendimit se nuk është e mundur të përcaktohet përgjithësisht për të gjitha kantieret në Zvicër se kur duhet të ndërpritet puna në një kantier ndërtimi për shkak të nxehtësisë së madhe. Situata specifike lokale duhet të merret parasysh në mënyrë që të merren parasysh të gjitha nevojat përkatëse. Në çdo rast, punëtorët në kantieret e ndërtimit duhet të mbrohen.