Sindikata Unia shprehet thellësisht e shqetësuar për sulmet masive të SHBA-së dhe Izraelit kundër Iranit, të cilat bien ndesh me të drejtën ndërkombëtare. Përballë sulmeve ajrore shkatërruese dhe sulmeve hakmarrëse iraniane në të gjithë rajonin e Gjirit, sindikata më e madhe e Zvicrës kërkon një deeskalim të menjëhershëm. Lufta nuk guxon të jetë kurrë mjet i politikës – ata që pësojnë, si gjithmonë, janë popullsia punëtore dhe shoqëria civile.
Sulmi ushtarak i SHBA-së dhe Izraelit ndaj Iranit dhe përshkallëzimi në gjithë rajonin e Gjirit jo vetëm që kërcënojnë jetën dhe sigurinë e miliona njerëzve, por gjithashtu minojnë shtyllat kryesore të së drejtës ndërkombëtare. Unia i bashkohet lëvizjes ndërkombëtare sindikale dhe u bën thirrje qeverive të të gjitha vendeve, që të mbrojnë të drejtën ndërkombëtare dhe të angazhohen për një zgjidhje paqësore të konfliktit.
Raportet për sulmet mbi infrastrukturën civile, siç është një shkollë në krahinën Hormozgan, janë tronditëse. Është e papranueshme që shkollat, spitalet, hotelet dhe shtëpitë e banimit të bëhen caqe të sulmeve. Unia u bën thirrje të gjitha palëve ndërluftuese që të respektojnë rreptësishtë Konventat e Gjenevës.
Unia qëndron solidare me sindikatat e pavarura dhe me të gjithë njerëzit në Iran, të cilët prej vitesh angazhohen me guxim për liri, të drejtat e grave dhe drejtësi sociale. Ne dënojmë dhunën e tmerrshme nga regjimi diktatorial i Mullahëve, ashtu siç dënojmë edhe sulmin ushtarak nga SHBA dhe Izraeli, i cili kërcënon t'i varrosë nën rrënoja këto përpjekje të shoqërisë civile. Populli iranian duhet të ketë të drejtën të vendosë për të ardhmen e vet, i lirë nga agresioni i jashtëm dhe shtypja e brendshme.
Paqja është parakushti bazë për punë me dinjitet dhe siguri sociale. Komuniteti ndërkombëtar nuk duhet të qëndrojë duarkryq ndërsa e drejta ndërkombëtare shkelet me këmbë dhe Lindja e Mesme zhytet në një zjarr të pakontrollueshëm.